«رۋحاني جاڭعىرۋ» باعدارلاماسى اياسىندا عابيت مۇسىرەپوۆ اتىنداعى ادەبي سىيلىقتىڭ يەگەرى, مادەنيەت قايراتكەرى, جۋرناليست, جازۋشى كۇليا ايداربەكوۆانىڭ «اكەگە قۇرمەت» پروزالىق كىتابىنىڭ تانىستىرىلىمى ءوتتى.
وڭتۇستىك قازاقستان وبلىسىنىڭ اققۇم اۋىلىندا تۋىپ-وسكەن كۇليا ايداربەكوۆا بۇگىندە «وتىرار» وڭىرلىك عىلىمي-امبەباپ كىتاپحاناسىنىڭ ديرەكتورى بولىپ قىزمەت ەتىپ كەلەدى. وقىرماندار ورتاسىندا كىتاپ قادىرىن ارتتىرۋدى ناسيحاتتاۋدى كۇندەلىكتى جۇمىسىنىڭ ءبىر بولشەگىنە اينالدىرعان كىتاپ جاناشىرىنىڭ باستاماسىمەن « ۇلىسىمنىڭ ۇيىتقىسى وڭتۇستىك», «جاسامپازدىققا تولى جيىرما جىل», ء«وز ەلىم - قازاقستانىم, «وڭتۇستىك قازاقستاننىڭ جاڭا كەلبەتى», «ىرىس الدى ىنتىماق», «اتا جۇرتتى اڭساۋ», «ەلباسى وڭتۇستىك قازاقستاندا», «قازاقستانعا ىستىق ىقىلاسپەن», «وڭتۇستىك قازاقستان وبلىسىنىڭ تابيعاتى», «وڭتۇستىك قازاقستاننىڭ مادەني ەسكەرتكىشتەرى», ء«داستۇر بىزدەن باستالدى», «وركەندەگەن كوركەمدەگەن وڭتۇستىك» كىتاپتارى وقىرمانعا جول تارتقان.
جەڭىستىڭ 70 جىلدىعىنا وراي «ەستەلىك كىتاپ وڭتۇستىك قازاقستاننان شىققان باتىرلار», « ۇلى وتان سوعىسىنا قاتىسقان وڭتۇستىك قازاقستاندىق جاۋىنگەرلەردىڭ ەستەلىك كىتابى» جانە « ۇلى دالا وسيەتى» سياقتى كىتاپتارى دا كىتاپحانالار سورەسىنە قويىلعان. ال دراماتۋرگيا سالاسىنداعى تىرناقالدى تۋىندىسى «جاماندىققا -جاقسىلىق» قويىلىمى «اشىق الاڭ» رەسپۋبليكالىق تəۋەلسىز تەاترلار فەستيۆالىنە قاتىسىپ ء«ۇمىت» نوميناتسياسىن جەڭىپ الدى.
وقىرماندار ورتاسىنا جاڭا تانىستىرىلىپ وتىرعان «اكەگە قۇرمەت» كىتابى تاۋەلسىزدىك جىلدارىنداعى قازاق پروزاسىندا ءوز ايتارى بار, ۇلتتىق يدەيانى تانىتاتىن شىعارما, كىتاپ اتا-انا مەن پەرزەنت اراسىنداعى قىرىم-قاتىناستاردىڭ تاربيەلىك ءمانىن اشىپ, وقىرمان جۇرەگىنە ىزگىلىك ءدانىن سەبەدى دەگەن پىكىرلەرىمەن ءبولىستى شاراعا قاتىسۋشىلار.
ءىس-شاراعا بەلگىلى قوعام جانە مادەنيەت قايراتكەرلەرى, باق وكىلدەرى مەن ستۋدەنتتەر قاتىستى.
ەلۆيرا سەرىكقىزى,
«ەگەمەن قازاقستان»
الماتى
